ಹಾವು ಮುಂಗುಸಿ ಕಾಳಗ

ನಿಸರ್ಗದೊಂದಿಗೆ ಬದುಕುವುದು ಹೇಗೆ?
ನನ್ನ ಮತ್ತು ನನ್ನ ಮನೆಯವರದು ಸ್ವಲ್ಪಮಟ್ಟಿಗೆ ಅಂಥ ಬದುಕೇ ಆದಂತೆ ಕಾಣುತ್ತದೆ ನನಗೆ.
ಯಾಕೆ ಗೊತ್ತಾ?
ನಮ್ಮ ಮನೆಯೊಳಗೆ ಎಂದೂ ಇರುವೆ ತಪ್ಪೋದಿಲ್ಲ.ನನ್ನ ಹೆಂಡತಿ ರೇಶ್ಮಾ ಅಡಿಗೆ ಕೋಣೆಯನ್ನು ಎಷ್ಟೇ ಶುಚಿಯಾಗಿಟ್ಟರೂ ಇರುವೆಗಳಿಗೆ ನಮ್ಮ ಮೇಲೆ ಅದೇನೋ ಪ್ರೀತಿ.
ನಮ್ಮದು ಸ್ವಲ್ಪ ಸಾವಯವ ಮನಸ್ಸಾದುದರಿಂದ ವಿಷ ಹಾಕಿ ಕೊಲ್ಲುವುದು ಅಷ್ಟು (ಮುಖ್ಯವಾಗಿ ನನ್ನ ಹೆಂಡತಿಗೆ ) ಒಪ್ಪಿಗೆಯಿಲ್ಲ.
ಇನ್ನು ಹಲ್ಲಿಗಳು ಮನೆಯೊಳಗೆ ಬೇಕಾದಷ್ಟಿವೆ.
ಜೇಡಗಳಿಗೂ ನಮ್ಮ ಹಂಚಿನ ಮನೆಯೆಂದರೆ ತುಂಬಾ ಇಷ್ಟ.ನಮ್ಮ ಮನೆಯಲ್ಲಿ ಬಲೆ ಇದ್ರೆ ಅದು ನಮ್ಮ ಪರಿಸರ ಪ್ರೀತಿಯ ದ್ಯೋತಕ ಅಂತ ತಾವು ತಿಳಿಯುವುದು.
ನಮ್ಮದು ಹಂಚಿನ ಮನೆಯಾದ್ದರಿಂದ ಇಲಿಗಳು ಅಟ್ಟದಲ್ಲಿ ದಿನವೂ ರಾತ್ರಿ ಓಡಾಡುವ ಸದ್ದು ಕೇಳುತ್ತಲೇ ನಾವು ನಿದ್ದೆ ಮಾಡುತ್ತೇವೆ.ಇಲಿ- ಬೆಕ್ಕುಗಳ ರನ್ನಿಂಗ್ ರೇಸಲ್ಲಿ ಯಾರು ಗೆದ್ದರು ಅಂತ ನಮಗೆ ಗೊತ್ತಾಗೋದಿಲ್ಲ.ಬಹುಶಃ ಇಲಿಯೇ ಗೆಲ್ಲುತ್ತೆ ಅನಿಸುತ್ತೆ.ಇಲ್ಲದಿದ್ರೆ ದಿನವೂ ರೇಸ್ ಇರುತ್ತಿರಲಿಲ್ಲ.
ಇಲಿಗೆ ಕೇಕು ಸಿಗುತ್ತದೆ ನಿಜ,ಆದರೆ ಅದನ್ನು ತಿಂದು ಇಲಿ ಮನೆಯೊಳಗೆ ಸತ್ತರೆ ? ಸತ್ತ ಇಲಿಯನ್ನು ಸಹಿಸಿಕೊಳ್ಳುವುದು ಬದುಕಿರುವ ಇಲಿಯನ್ನು ಸಹಿಸಿಕೊಳ್ಳುವುದಕ್ಕಿಂತ ಕಷ್ಟ. ಆದರೆ ಕೇಕು ತಯಾರಕರು ಹೇಳುವಂತೆ, ಅದನ್ನು ತಿಂದ ಇಲಿ ನೀರು ಹುಡುಕುತ್ತಾ ದೂರ ಹೋಗುತ್ತದಂತೆ .ಹಾಗೆ ದೂರ ಹೋಗಿ ಸಾಯುತ್ತದಂತೆ.ನೀರಿಗಾಗಿ ಅದು ನಮ್ಮ ಮನೆಯೊಳಗೇ ಹುಡುಕಿದರೆ ಅಂತ ನನ್ನ ಹೆದರಿಕೆ.
ಬಿ.ಸಿ.ರೋಡಿನಲ್ಲಿರುವ ನಮ್ಮ ಮನೆ ಸುಮಾರು ೪೫ ಸೆಂಟ್ಸ್ ಆವರಣದೊಳಗೆ ಇದೆ.
ಈ ಆವರಣದಲ್ಲಿ ಗೆದ್ದಲುಗಳ ಹಲವು ಹುತ್ತಗಳಿವೆ.ಗದ್ದಲು ರೈತನ ಮಿತ್ರನೇ? ಶತ್ರುವೇ? ನನಗೆ ಗೊತ್ತಿಲ್ಲ.
ಗೆದ್ದಲುಗಳ ವಾಸ್ತುತಜ್ಞ ಯಾರೋ? ಅದ್ಭುತ ಕಂಸ್ಟ್ರಕ್ಷನ್ ಅವುಗಳದು.
ಇನ್ನು ಕುಂಡೆಚ್ಚ , ಕೂರ್ಬಾಯಿಗಳು ಹೇಗೂ ಉಂಟಲ್ಲ.
ನಮ್ಮಲ್ಲಿ ಮುಳ್ಳು ಹಂದಿಯ ಮಾಟೆ ಕೂಡ ಒಂದುಂಟು.೪ವರ್ಷಗಳ ಹಿಂದೆ ಕಾಣಸಿಕ್ಕಿದ ಮುಳ್ಳಂದಿ ಮತ್ತೆ ಕಾಣಸಿಕ್ಕಿಲ್ಲ.
ಅವುಗಳಿಗೆ ಕಂತ್ರಾಟು ಕೊಟ್ಟರೆ ನಮ್ಮ ಸರಕಾರಿ ಕಟ್ಟಡಗಳ ಕೆಲಸ ಬಹು ಬೇಗ ಮುಗಿಯುತ್ತಿತ್ತು.
ಒಂದು ವೇಳೆ ಬಿದ್ದರೂ ಮರುದಿನವೇ ಅದನ್ನು ಪುನಃ ಕಟ್ಟಿ ನಿಲ್ಲಿಸುವ ತಾಕತ್ತು, ಕಾರ್ಯಕ್ಷಮತೆ ಅವುಗಳಿಗಿದೆ.
ನಮ್ಮ ಆವರಣದಲ್ಲಿ ದಿನವೂ ಬೆಳಗ್ಗೆ ವಿವಿಧ ಹಕ್ಕಿಗಳು ಕೂಗುತ್ತವೆ (ಅದನ್ನು ಕೇಳಲು ಬಹಳ ಬಾರಿ ನಾನು ಏಳದಿದ್ದರೂ.)
ರೆಂಜೆ ಮರದ ತುದಿಯಲ್ಲಿ ಕೂತ ಕೋಗಿಲೆ,ಅದರ ಧ್ವನಿಯನ್ನು ಅಣಕಿಸಿದರೆ ಮತ್ತೆ ಮತ್ತೆ ಕೂಗುವುದೇ ಒಂದು ಚಂದ.
ನನಗೆ ಹಕ್ಕಿಗಳ ಹೆಸರು ಗೊತ್ತಿಲ್ಲ. ಗುಬ್ಬಿ ಹಕ್ಕಿ ಸೇರಿದಂತೆ ಅನೇಕ ಹಕ್ಕಿಗಳು ಕಾಣಸಿಗುತ್ತವೆ.
ಎರಡು ಕಾಡುಕೋಳಿಗಳ ಒಂದು ಜೋಡಿಯು ತಿಂಗಳುಗಳ ಕಾಲ ನಮ್ಮ ಮನೆಯ ಸುತ್ತ ಮುತ್ತ ಇತ್ತು.
ಒಂದು ಸುಂದರ ಬೆಳಗ್ಗೆ ನೋಡುವಾಗ ಇರಲಿಲ್ಲ.
ಪಗೆಲ ಅಂತ ಒಂದು ನಿರುಪದ್ರವಿ ಪುಟ್ಟ ಹಾವು ಇದೆಯಲ್ಲ,ಅದು ಆಗಾಗ ಸುತ್ತು ಬರುತ್ತಾ ಇರುತ್ತದೆ.
ಕಳೆದ ನಾಲ್ಕೈದು ವರ್ಷಗಳಲ್ಲಿ ಮುರ್ನಾಲ್ಕು ಸಲ ನಾಗರಹಾವು ಕೂಡ ನಮ್ಮ ಅಂಗಳದಲ್ಲಿ ಹಾದು ಹೋಗಿದೆ. ಅದನ್ನು
ನೋಡಿದ ನಾಲ್ಕೈದು ದಿನಗಳ ಕಾಲ ಹಗಲು -ರಾತ್ರಿ ಕಿಟಕಿ ತೆರೆದಿಡಲೂ ಭಯ. ಆಮೇಲೆ ಮರೆತು ಹೋಗುತ್ತದೆ ನಿಧಾನವಾಗಿ.
ನಾಗರ ಹಾವು ರಾತ್ರಿ ಬರುವುದಿಲ್ಲವಂತೆ. ಬಹುಶಃ ಅದಕ್ಕೇ ಅದನ್ನು "ಒಳ್ಳೆಯದು" ಅಂತ ಕರೆಯುವುದು ಇರಬೇಕು.
ಕೇರೆ ಹಾವು ರಾತ್ರಿ ಮನೆಯೊಳಗೆ ನಿಂತರೆ ಭಾರಿ ಅದ್ರಷ್ಟವಂತೆ.ಆದ್ರೆ ಅದು ರಾತ್ರಿಗೆ ನಿಲ್ಲುದಿಲ್ಲವಂತೆ.
ರಾತ್ರಿ ತಿರುಗಾಡುವ ಹಾವುಗಳಿಗೆ ಬುದ್ಧಿ ಇಲ್ಲ. ಅದಕ್ಕೇ ಅವುಗಳಿಗೆ ಕುರೆಕಂದಡಿ, ಕಟ್ಟಮಲಕ್ಕಡಿ ಇತ್ಯಾದಿ ಕೊಳಕು ಹೆಸರುಗಳು
ಅಂತ ಕಾಣುತ್ತೆ.(ಹೆಸರಿನಲ್ಲೇನಿದೆ? ಗುಲಾಬಿಯನ್ನು ಯಾವ ಹೆಸರಿನಲ್ಲಿ ಕರೆದರೇನು ಅಂತೀರಾ)
ಈಗ ಇದನ್ನು ಕಂಪ್ಯೂಟರಿನಲ್ಲಿ ಕುಟ್ಟುತ್ತಿರುವಾಗ ಮೇಜಿನ ಅಡಿಗೆ ಬಗ್ಗಿ ನೋಡುತ್ತಿದ್ದೇನೆ ಆಗಾಗ,ಯಾಕೆಂದರೆ ಬಾಗಿಲು ತೆರೆದೇ ಇದೆ ,ಹಾವು ನುಗ್ಗಿಲ್ಲವೆಂದು ಖಾತರಿ ಮಾಡಿಕೊಳ್ಳಬೇಕಲ್ಲ?
ಕತ್ತಲೆಯಲ್ಲಿ ಒಂಥರಾ ಹೆದರಿಕೆ. ಯಾಕೆಂದ್ರೆ ಕಣ್ಣು ಕಾಣುವುದಿಲ್ಲಲ್ಲಾ? ಅಲ್ಲದಿದ್ರೆ ಯಾರು ಹೆದರ್ತಾರೆ?
ಸತ್ಯ ಹೇಳ್ತೇನೆ, ಕಾಳಿಂಗ, ನಾಗರದಂಥ ಹಾವುಗಳ ಬಗ್ಗೆ ನನಗೆ ಪ್ರೀತಿಯಿಲ್ಲ.ಭೀತಿ ಮಾತ್ರ ಇರೋದು.
ಅಂದ ಹಾಗೆ ಗದ್ದೆಗಳಲ್ಲಿ ಇಲಿಗಳನ್ನು ಹಿಡಿಯಲು ಕೇರೆಗಳ ವಂಶಾಭಿವ್ರದ್ಧಿ ಮಾಡಿದರೆ ಹೇಗೆ? ಕೇರೆಗಳಂಥ ವಿಷವಿಲ್ಲದ ಹಾವುಗಳು ಹೆಚ್ಚಾದರೆ ವಿಷದ ಹಾವುಗಳ ಸಾಂಧ್ರತೆ ಕಡಿಮೆ ಆದೀತೋ ಏನೋ? ಪರಿಸರ ಸಮತೋಲನಕ್ಕೆ ವಿಷದ ಹಾವುಗಳೂ ಬೇಕು ಅಂತ ಯಾರದ್ರೂ ಹೇಳೂದಾದ್ರೆ ಓಕೆ ಅಂತ, ಮನಸ್ಸಿಲ್ಲದ ಮನಸ್ಸಲ್ಲಿ ಎಲ್ಲರ ಹಾಗೆ , (ಪರಿಸರವಿರೋಧಿ ಅನ್ನಿಸಿಕೊಳ್ಳುವ ಧೈರ್ಯವಿಲ್ಲದೆ !?)ನಾನೂ ಒಪ್ಪಬೇಕಷ್ಟೆ:
ಮನಃಪೂರ್ವಕವಾಗಿ ಅಲ್ಲ.

ಕಳೆದ ಸುಮಾರು ಐದು ವರ್ಷಗಳಿಂದ ನಮಗೆ ಅಂಗಳದಲ್ಲಿ ನಿತ್ಯವೂ ಕಾಣಸಿಗುವ ಪ್ರಾಣಿಗಳೆಂದರೆ ಮುಂಗುಸಿಗಳು.
ಮುಂಗುಸಿಗಳ ಸಂಸಾರದ ಸವಾರಿ ನೋಡುವುದೇ ಒಂದು ಚಂದ!!!
ಆರಂಭದಲ್ಲಿ ಗಂಡು-ಹೆಣ್ಣು ಮಾತ್ರ ಇದ್ದವು. ಕೆಲ ಸಮಯದ ನಂತರ ತಾಯಿ-ತಂದೆಯ ಜೊತೆ ನಾಲ್ಕು ಮರಿಗಳು ಸಾಲಾಗಿ ಹೋಗುತ್ತಿದ್ದವು.ಮರಿಗಳು ದೊಡ್ಡವಾದ ಬಳಿಕ ತಂದೆ ತಾಯಿ ಜೊತೆಯಲ್ಲಿ ಕಾಣುವುದಿಲ್ಲ. ಆದ್ರೆ ಎರಡೆರಡು ಮುಂಗುಸಿಗಳು ಈಗಲೂ ತಿರುಗಾಡುತ್ತವೆ.ಸಲಿಂಗಿಗಳೋ ಅನ್ಯಲಿಂಗಿಗಳೋ ಗೊತ್ತಿಲ್ಲ.(ಅನ್ಯಕೋಮಲ್ಲದಿದ್ದರೆ ಯಾರ ಹೆದರಿಕೆಯೂ ಅವಕ್ಕಿಲ್ಲ ಬಿಡಿ.)

ಹಾವು -ಮುಂಗುಸಿಗಳು ಬದ್ಧ ವೈರಿಗಳು ಎಣ್ದು ಎಲ್ಲ ಕಡೆ ಕೇಳಿದ್ದೇವೆ ನಾವು.ಅದು ವಾಸ್ತವವೇ ಎಂಬುದು ನನಗೆ ಗೊತ್ತಿರಲಿಲ್ಲ.
ಗೊತ್ತಾಗುವ ಪ್ರಸಂಗವೂ ಬಂತು ನೋಡಿ!!
ನಮ್ಮ ಮನೆಯಂಗಳದ ಬದಿಯಲ್ಲೇ ನಡೆದ ದೊಡ್ಡದೊಂದು ಕಾಳಗವೇ ಇದನ್ನು ನಿರೂಪಿಸಿತು. ಒಂದು ದಿನ ರೇಶ್ಮಾ ನನ್ನನ್ನೂ ಮಕ್ಕಳನ್ನೂ ಇಲ್ಲಿ ಬನ್ನಿ! ಇಲ್ಲಿ ಬನ್ನಿ! ಎಂದು ತುಸು ಆಶ್ಚರ್ಯ, ತುಸು ಸಂಭ್ರಮ , ತುಸು ಆತಂಕದಿಂದ ಕರೆದಳು.ನಾವೆಲ್ಲ ಮನೆಯ ಬಡಗು ದಿಕ್ಕಿನ ಬಾಗಿಲಿಗೆ ಬಂದಾಗ ಸುಮಾರು ಇಪ್ಪತ್ತೇ ಅಡಿಗಳ ದೂರದಲ್ಲಿ ಒಂದು ನಾಗರಹಾವು ಮತ್ತು ಒಂದು ಮುಂಗುಸಿ ಕಾದಾಡುತ್ತಿದ್ದವು.ಹಾವು ಹೆಡೆಯೆತ್ತಿ ಎತ್ತಿ ಹೊಡೆಯಲು ಯತ್ನಿಸುತ್ತಿತ್ತು.ಮುಂಗುಸಿ ಬಾಲದ ಮೇಲೆಯೇ ನಿಂತಂತೆ
ಎದ್ದೆದ್ದು ನಿಂತು ಹಾವನ್ನು ಮಣಿಸಲು ಯತ್ನಿಸುತ್ತಿತ್ತು. ಮುರ್ನಾಲ್ಕು ನಿಮಿಷಗಳ ಕಾಲ ಹೀಗೆ ನಡೆಯಿತು.ಆಮೇಲೆ ಬಹುಶಃ ನಮ್ಮ(ಪ್ರೇಕ್ಷಕರ) ಇರುವಿಕೆ ಅವುಗಳ ಗಮನಕ್ಕೆ ಬಂದು ಒಂದೀಚೆ ಒಂದಾಚೆ ಹೋದವು.ಯಾರೂ ಗೆಲ್ಲಲಿಲ್ಲ.ಯಾರೂ ಸೋಲಲಿಲ್ಲ.
ಹಾವು ಸಾಯದ್ದರಿಂದ ನಾನು ಗೆದ್ದೆ!!!!ಅಲ್ಲದಿದ್ರೆ ,ಅದರ ಬೊಜ್ಜ ಇತ್ಯಾದಿ....ಬೇಕೋ ಬೇಡವೋ ಒಟ್ಟಿನಲ್ಲಿ ತಲೆ ಹಾಳಾಗುತ್ತಿತ್ತು.
ಬೆಂಗ್ಳೂರಂಥ ಪೇಟೆಗಳಲ್ಲಿಯೇ ಹಾವುಗಳ ಉಪದ್ರ ತುಂಬಾ ಉಂಟಂತೆ.
ಬೆಂಗ್ಳೂರಲ್ಲಿ ನಮ್ಮ ನೆಂಟರೊಬ್ಬರ ಮನೆಯಲ್ಲಿ ಹಾವು ಬಂದಿದ್ದಾಗ ಹಾವು ಹಿಡಿವವನಿಗೆ ಫೋನು ಮಾಡಿದ್ರು. ಆಗ ಅವನು ಹೇಳಿದ್ದು-" ಇಲ್ಲೊಂದು ಹಾವು ಹಿಡೀತಾ ಇದ್ದೇನೆ, ಈಗ ಬರ್ತೇನೆ "ಅಂತ. ಆಮೇಲೆ ಇವರಲ್ಲಿ ಹಾವಿನ ಬಾಲವನ್ನು ಎಡಗೈಯಲ್ಲಿ ಹಿಡಿದು ಚೀಲಕ್ಕೆ ತುಂಬುತ್ತಿದ್ದಾಗ ಅವನಿಗೆ ಫೋನು ಬಂತು. ಹೇಳುತ್ತಿದ್ದ-" ಹಾವಾ? ಈಗ ಬರ್ತೇನೆ, ಈ ಹಾವನ್ನು ಎಲ್ಲಾದ್ರೂ ಬಿಟ್ಟು ಬರ್ಬೇಕಷ್ಟೆ." ಅಂತ.ಅವನು ಅಲ್ಲಿ ತಲುಪಿ ಆ ಹಾವನ್ನು ಹಿಡಿದಾಗುವಾಗ ಇವನು ಬಿಟ್ಟಲ್ಲಿಂದ ಮತ್ತೆ ಫೋನು ಬರಬಹುದು.!! ಹಾವಿಗೆ ಹಳ್ಳಿ ಅಂತಿಲ್ಲ , ದಿಲ್ಲಿ ಅಂತಿಲ್ಲ ಬಿಡಿ.
ಒಂದು ನರಹುಳುವೂ ಅಪ್ಪಣೆ ವಿನಃ ಪ್ರವೇಶಿಸಲಾರದ ಮಂತ್ರಿಗಳ ಮನೆ ಕಂಪೌಂಡಿನ ಒಳಗೆ ಪೋಲೀಸರ ಕಣ್ಣು ತಪ್ಪಿಸಿ ನಾಗರಹಾವು ನುಗ್ಗಿ ಶಾಂತಿ ಮಾಡಿಸುವಂತೆ ಮಾಡಿದೆಯಂತೆ.
ಕುಕ್ಕೆಸುಬ್ರಮಣ್ಯದಲ್ಲೆಲ್ಲ ಅತಿ ಹೆಚ್ಚು ಪ್ರಾಯಶ್ಚಿತ್ತ , ದೋಷಪರಿಹಾರ ಎಲ್ಲಾ ಮಾಡುವುದು ಪೇಟೆಯವರೇ.

ಅದಿರಲಿ.
ಈಗೊಂದು ತರ್ಕ ಜಿಜ್ಞಾಸೆಯುಂಟು ನಿಮ್ಮೊಡನೆ ಹಂಚಿಕೊಳ್ಳಲಿಕ್ಕೆ.ಸಿಲ್ಲಿಯಾದ್ರೂ ಗಂಭೀರವಾದದ್ದೆ!!
ನಮ್ಮ ಆವರಣದೊಳಗೆಯೇ ಮನೆಯ ಹಿಂದೆ ಸುಮಾರು ಏಳೆಂಟು ಅಡಿಗಳ ದೂರದಲ್ಲಿ ಕಳೆದ ಆರು ವರ್ಷಗಳಿಂದ ಒತ್ತರೆಯೇ ಮಾಡದ (ನಾವು ಇದನ್ನು ಖರೀದಿಸಿದ ನಂತರ) , ಪೊದರು ಮರ ಬಳ್ಳಿಗಳಿಂದ ಕೂಡಿದ ,ಸುಮಾರು ೩೫ ಗುಣಿಸು ೯೦ ಅಡಿ ವಿಸ್ತೀರ್ಣದ ಜಾಗ ಇದೆ. ಮುಳ್ಳಂದಿ ಮಾಟೆ , ದೊಡ್ಡ ಪುಂಚಗಳೆಲ್ಲ ಇರುವುದು ಇಲ್ಲಿಯೇ.

ಈಗ ಪ್ರಶ್ನೆ ಏನಪ್ಪಾ ಅಂದ್ರೆ ,

ಹೀಗೆ ಮನೆ ಹತ್ರ ಬಲ್ಲೆ ಇತ್ಯಾದಿ ಇರುವುದರಿಂದ ಹಾವುಗಳಿಗೆ ಅಲ್ಲಿಯೇ ಆಶ್ರಯ ಸಿಗುವುದರಿಂದ ಅವುಗಳು ಅಂಗಳಕ್ಕೆ ಅಥವಾ ಮನೆಯೊಳಗೆ ಬರುವ ಸಂಭವ ಕಡಿಮೆಯೋ?
ಅಥವಾ
ಹೀಗೆ ಮನೆ ಹತ್ರ ಬಲ್ಲೆ ,ಪೊದರುಗಳನ್ನು ಬೆಳೆಸುವುದರಿಂದ ಹೊರಗಿಂದಲೂ ದೂರದಿಂದಲೂ ಹಾವುಗಳು ಅದರತ್ತ ಆಕರ್ಷಿತವಾಗಿ ಮನೆ ಆವರಣಕ್ಕೆ ಬರುವ ಸಂಭವ ಜಾಸ್ತಿಯೋ?
ಉತ್ತರ ಗೊತ್ತಿದ್ದರೆ ಹೇಳಿ.


ಕೊನೆ ಬೆಡಿ :

ಮದುವೆಯಾಗಲು ತುಂಬಾ ಸಮಯ ಹುಡುಗಿ ಸಿಗದೆ ಕೊನೆಗೆ ಹುಡುಗಿ ಸಿಕ್ಕಿದಾಗ ತಾನು ಹರಕೆ ಹೇಳಿದ್ದಂತೆಯೇ ಮದುವೆ ದಿನವೇ ಮಾಲೆ(ಅಯ್ಯಪ್ಪನದ್ದು!!? ) ಹಾಕಿದನಂತೆ

ಇಂಗ್ಲಿಷ್ ಮತ್ತು ನಮ್ಮ ಭಾಷೆ
ಇಂಗ್ಲಿಷ್ ಭಾಷೆಗೆ ಅನ್ವಯಿಸುವ ಹಲವು ಸಿದ್ಧಾಂತಗಳನ್ನು ಹಾಗೆ ಹಾಗೆಯೇ ನಮ್ಮ ಕನ್ನಡ ಭಾಷೆಗೂ ಅನ್ವಯಿಸುವುದನ್ನು ಕೆಲವೊಮ್ಮೆ ನಾವು ಕಾಣುತ್ತೇವೆ.
ಕನ್ನಡವನ್ನು ಹೇಗೆ ಕಲಿಸಬೇಕು ಎಂಬ ಬಗೆಗಿನ ಚರ್ಚೆ ಕೂಡ ಈ ನಿಟ್ಟಿನಲ್ಲಿ ಗಮನಾರ್ಹ.
ಯಾವುದೇ ಭಾಷೆಯನ್ನು ಕಲಿಯುವ ಸರಿಯಾದ ಹಂತಗಳು ನಮಗೆಲ್ಲ ಗೊತ್ತಿರುವಂಥದ್ದೆ. ಆಲಿಸು, ಮಾತಾಡು, ಓದು, ಬರೆ- ಹೀಗೆ ಹಂತಗಳು.
ಮಾತ್ರ್ ಭಾಷೆಯಲ್ಲದ ಬೇರೊಂದು ಭಾಷೆಯನ್ನು ಮಾತಾಡಲು ಕಲಿಸುವಾಗ ಶಬ್ದ ಅಥವಾ ವಾಕ್ಯಗಳ ಮುಲಕ ಕಲಿಸುವುದು ಸರಿಯಾಗುತ್ತದೆ.
ಇಂಗ್ಲಿಷನ್ನು ಕಲಿಸುವಾಗ ಇದೇ ತತ್ವ ಬಹುಮಟ್ಟಿಗೆ ಬರಹಕ್ಕೂ ಅನ್ವಯವಾಗುತ್ತದೆ. ಆದರೆ ಮಕ್ಕಳಿಗೆ ಕನ್ನಡ ಬರೆಯಲು ಕಲಿಸುವಾಗ ಈ ತತ್ವ ಹೊಂದುತ್ತದೆಯೇ?
ಪ್ರಸಿದ್ಧ ಬರಹಗಾರರಾದ ಕೆ.ಟಿ. ಗಟ್ಟಿಯವರ ಭಾಷಾಬೋಧನೆಯ ಪುಸ್ತಕಗಳನ್ನು ಗಮನಿಸಿದಾಗ ಕೆಲವು ಸಂದೇಹಗಳು ಏಳುತ್ತವೆ.
ಗಟ್ಟಿಯವರು ಕನ್ನಡ , ಇಂಗ್ಲಿಷ್ ಮತ್ತು ತುಳು ಕಲಿಸುವ ಪುಸ್ತಕಗಳನ್ನು ಬರೆದಿದ್ದಾರೆ. ಬರೆಯುವುದನ್ನು ಕಲಿಸಲು ಕನ್ನಡ -ಇಂಗ್ಲಿಷ್ ಎರಡಕ್ಕೂ ಒಂದೇ ಮಾದರಿಯನ್ನು ಅವರ ಪುಸ್ತಕಗಳು ಅನುಸರಿಸುತ್ತವೆ."ಅಕ್ಷರಗಳ ಮುಲಕ ಕಲಿತವರು (ಅಂದರೆ ಅ ಆ ಇ ಈ ಇತ್ಯಾದಿಯೊಂದಿಗೆ ಆರಂಭಿಸಿ) ಅಕ್ಷರಗಳನ್ನು ಕೂಡಿಸಿ ಓದುವ ಅಭ್ಯಾಸವನ್ನು ರೂಢಿಸಿಕೊಳ್ಳುತ್ತಾರೆ; ವಾಕ್ಯಗಳ ಮುಲಕ ಕಲಿಯುವುದು ಹೆಚ್ಚು ಉಪಯುಕ್ತ ಮತ್ತು ಅದೇ ವೇಗದ ಕಲಿಕೆಗೆ, ಓದುವಿಕೆಗೆ, ವೇಗದ ಬರಹಕ್ಕೆ ಅನುಕೂಲಕರ " ಎಂಬುದು ಗಟ್ಟಿಯವರ ತಾತ್ವಿಕತೆ.ಕನ್ನಡದಲ್ಲಿ ಹೀಗೆ ಕಲಿತವರು ಆರಂಭದಲ್ಲಿ ಅಕ್ಷರ ಕೂಡಿಸಿ ಓದುವುದು ನಿಜ. ಆದರೆ ಕೆಲವೇ ಸಮಯದಲ್ಲಿ ಶಬ್ದಗಳನ್ನು ,ವಾಕ್ಯಗಳನ್ನು ಇಡಿಯಾಗಿ ಗ್ರಹಿಸಿ ಓದತೊಡಗುತ್ತಾರೆ.ಅಕ್ಷರ ಕೂಡಿಸಿ ಓದುವುದನ್ನೇ ಮುಂದುವರಿಸುತ್ತಾರೆ ಎಂದುಕೊಳ್ಳುವುದು ಸರಿಯಲ್ಲ.ಅಕ್ಷರಗಳು ಮಿತ ಹಾಗೂ ಶಬ್ದಗಳು ಅಪರಿಮಿತವಾದ್ದರಿಂದ ಕನ್ನಡದ ಮಟ್ಟಿಗೆ ಅಕ್ಷರಗಳನ್ನು ಹಾಗೂ ಕಾಗುಣಿತಗಳನ್ನು ಕಲಿಯುದೆಂದರೆ ಅಸಂಖ್ಯಾತ ಪದಗಳನ್ನು ಮತ್ತು ವಾಕ್ಯಗಳನ್ನು ಓದುವ ಮತ್ತು ಬರೆವ ಸೂತ್ರಗಳನ್ನು ಕರಗತ ಮಾಡಿಕೊಂಡಂತೆಯೇ ಆಗುತ್ತದೆ.

ಬಳಕೆಯ ಸನ್ನಿವೇಶವನ್ನು ಗಮನಿಸಿದರೆ , ಯಾವುದೇ ಭಾಷೆಯ ಮುಖ್ಯವಾದ ಅಥವಾ ಅರ್ಥಪೂರ್ಣ ಘಟಕವೆಂದರೆ ವಾಕ್ಯವೆಂಬುದು ಸರಿ.ಆದರೆ, ಅಕ್ಷರಗಳ ವಿಷಯಕ್ಕೆ ಬಂದರೆ ಅ ಆ ಇ ಈ ಕಲಿಯುವುದು ಮತ್ತು ಎ ಬಿ ಸಿ ಡಿ ಕಲಿಯುವುದು ಒಂದೇ ಅಲ್ಲ.ಇಂಗ್ಲಿಷ್ ಧ್ವನ್ಯಾತ್ಮಕ ಭಾಷೆ ಅಲ್ಲ. ಕನ್ನಡ ಧ್ವನ್ಯಾತ್ಮಕ ಭಾಷೆ. (ಮಂಚ ಮಂಗ ಮೊದಲಾದ ಕಡೆ ಮಾತ್ರ ಉಚ್ಚಾರಕ್ಕಿಂತ ಬೇರೆಯಾದ ಬರಹ ಇದೆ ಅಷ್ಟೆ.) ಕನ್ನಡದಲ್ಲಿ ಇನ್ನೊಬ್ಬ ವ್ಯಕ್ತಿ ಹೇಳಿದ ಹೊಸ ಪದವನ್ನು ಅಕ್ಷರ ಗೊತ್ತಿದ್ದವನು ಬರೆಯಬಲ್ಲ.ಇದು ಸಂಸ್ಕ್ರುತವನ್ನು ಅನುಸರಿಸಿದ್ದರಿಂದ ಕನ್ನಡಕ್ಕಾದ ದೊಡ್ಡ ಲಾಭ.( ಸಂಸ್ಕ್ರುತವನ್ನು ದ್ವೇಷಿಸಿದ ತಮಿಳಿನಲ್ಲಿ ಅದು ಸಾಧ್ಯವಿಲ್ಲ.)
ಇಂಗ್ಲಿಷಿನಲ್ಲಿ ಸ್ಪೆಲ್ಲಿಂಗ್ ಗೊತ್ತಿಲ್ಲದೆ ಹೊಸ ಪದವನ್ನು ಕೇವಲ ಕೇಳಿದ ಆಧಾರದಲ್ಲಷ್ಟೇ ಬರೆಯಲು ಅಸಾಧ್ಯ.
ವರ್ಣಮಾಲೆಯ ಕಲಿಕಾ ವಿಧಾನ ಇಂಗ್ಲಿಷಿನಷ್ಟರ ಮಟ್ಟಿಗೆ ಕನ್ನಡದಲ್ಲಿ ತಿರಸ್ಕಾರಯೋಗ್ಯವಾದುದಲ್ಲ.
ನೀವೇನಂತೀರಿ ?

ಕೊನೆಬೆಡಿ :
ಬೀಜ ಮೊಳಕೆಯೊಡೆವಾಗ ಸದ್ದಿಲ್ಲವೆಂದು ಡಿ.ವಿ.ಜಿ.ಹೇಳಿದಂತೆ , ಹಣ್ಣೆಲೆ ಉದುರುವಾಗ ಸದ್ದಿಲ್ಲ ಸುದ್ದಿಯಿಲ್ಲ. ಮಾನವ ಮಡಿದಾಗ ಬೆಡಿಮದ್ದಿನ ಸದ್ದು,ಗೋಲಿಬಾರಿನ ಸುದ್ದಿ.

ನಗರ ಮತ್ತು ನಾಗರಿಕ ಪ್ರಜ್ಞೆ

ಸುಮಾರು ಇಪ್ಪತ್ತೆಂಟು- ಇಪ್ಪತ್ತೊಂಬತ್ತು ವರ್ಷಗಳ ಹಿಂದೆ, ಬಹುಶಃ ನಾನಾಗ ನಾಲ್ಕನೆಯೋ ಐದನೆಯೋ ಕ್ಲಾಸಿನಲ್ಲಿ ಇದ್ದಿರಬಹುದು, ಒಂದು ದಿನ ನನ್ನ ಅಪ್ಪಒಮ್ಮೆ ಮಂಗಳೂರಿಗೆ ಹೋಗುವಾಗ ನನ್ನನ್ನು ಕರೆದುಕೊಂಡು ಹೋಗಿದ್ದರು. ನಮ್ಮ ಮನೆ ಅಜಕ್ಕಳದಿಂದ ಸುಮಾರು ಮುರು ಮೈಲು ದೂರ ಇರುವ ಬುಳೇರಿಕಟ್ಟೆಗೆ ನಡೆದು ಅಲ್ಲಿಂದ ಬಸ್ಸಲ್ಲಿ ಪುತ್ತೂರಿಗೆ ಹೋಗಿ ಅಲ್ಲಿಂದ ನೋನ್-ಸ್ಟೋಪ್ ಬಸ್ಸಲ್ಲಿ ಮಂಗಳೂರಿಗೆ ಹೋಗುವುದು ಆಗೆಲ್ಲ.
ಮಂಗಳೂರಿನ ಹಂಪನಕಟ್ಟೆ ಬಸ್ ಸ್ಟಾಂಡಲ್ಲಿ ಇಳಿದು(ಈಗ ಪಾರ್ಕಿಂಗ್ ಇರುವ ಜಾಗದಲ್ಲಿ ಆಗ ಬಸ್ ಸ್ಟಾಂಡ್ ಇತ್ತು) ಮಾರ್ಕೆಟಿನ ಕಡೆಗೆ ಹೋಗುವಾಗ ಅಪ್ಪ ನನ್ನ ಕಾಲನ್ನು ನೋಡಿದರು. ಕೇಳಿದರು,
"ಥಕ್ ! ಬೋದಾಳ, ನೀನು ಚಪ್ಪಲಿ ಹಾಕ್ಲಿಲ್ಲವೋ?"
ನಾನೆಂದೆ, "ಬೇಡಾಂತ ಕಂಡಿತು, ಇಡೀ ದಿನ ಹಾಕಿದ್ರೆ ಚಪ್ಪಲಿ ಕಚ್ಚಿದ್ರೆ ಅಂತ ". ಆ ಕಾಲದಲ್ಲಿ ಮನೆಯ ಮೆಟ್ಟಿಲಿಳಿವಾಗ ಚಪ್ಪಲಿ ಕಡ್ಡಾಯವಾಗಿರಲಿಲ್ಲ.
ಅಪ್ಪ ಕೇಳಿದ್ರು ,"ಮನೆಯಲ್ಲಿ ಜೋಡು ಉಂಟಲ್ಲ? "
" ಉಂಟು. "
ಮನೆಯಲ್ಲಿ ಒಂದಿರುತ್ತಾ ಮಂಗಳೂರಲ್ಲಿ ಹೊಸತೊಂದು ಖರೀದಿಸುವುದು ವೇಸ್ಟು. ವಿಷಯ ಅದಲ್ಲ.
ಅಷ್ಟು ದೂರ ನಡೆವಾಗಲಾಗಲೀ, ಈವನ್ ಪುತ್ತೂರು ಪೇಟೆಯಲ್ಲಾಗಲೀ ನನ್ನ ಕಾಲಿನ ಬಗ್ಗೆ ಕಾಳಜಿ ಮಾಡದ ಅಪ್ಪ ಈಗ ಯಾಕೆ ಈ ಪ್ರಶ್ನೆ ಕೇಳ್ತಾರೆ ಅಂತ ಆಗ ನನಗೆ ಅರ್ಥ ಆಗ್ಲಿಲ್ಲ.
ಆದ್ರೆ ಆ ಇಡೀ ಮಂಗಳೂರು ಯಾತ್ರೆಯಲ್ಲಿ ನನಗೆ ನೆನಪಿರೋದು ಅದೊಂದೇ ಸಂಗತಿ. ಮಂಗಳೂರಲ್ಲಿ ಯಾಕೆ ಚಪ್ಪಲಿ ಬಗ್ಗೆ , ಕಾಲಿನ ಬಗ್ಗೆ ಕಾಳಜಿ ಮಾಡಿದ್ರು ಅಂತ ಸುಮಾರು ವರ್ಷಗಳ ನಂತರ ನನಗೆ ಅರ್ಥ ಆಯಿತು.ನಗರಗಳ ಗಲೀಜು ಅಂಥದ್ದು. ಈಗ ಹಳ್ಳಿಗಳು ನಗರಗಳಾಗುತ್ತಿರುವಾಗ ಗಲೀಜು ಅಲ್ಲಿಗೂ ತಲುಪುತ್ತಿದೆ ಅನ್ನುವುದು ಬೇರೆ ಪ್ರಶ್ನೆ.

ಇಂದು ನಗರಗಳು ಕಸ ತಯಾರಿಯ ಕೇಂದ್ರಗಳಾಗುತ್ತಿವೆ. ಮುಖ್ಯವಾಗಿ ಪ್ಲಾಸ್ಟಿಕ್ ತ್ಯಾಜ್ಯ.ಪ್ಲಾಸ್ಟಿಕ್ ತ್ಯಾಜ್ಯಕ್ಕೆ ಅಂಗಡಿ ಮಾಲಿಕರಂತೆ ನಮ್ಮಂಥ ಗಿರಾಕಿಗಳೂ ಕಾರಣ ನಿಜ. ಆದರೆ ,ನಮ್ಮ ಸಣ್ಣ ಪೇಟೆಗಳಲ್ಲಿ ಅನೇಕ ಬಾರಿ ನಾನು ನೋಡಿದ್ದೇನೆ- ಅಂಗಡಿಯವರು ಅದರಲ್ಲೂ ಮುಖ್ಯವಾಗಿ ಫೇನ್ಸಿ ಅಂಗಡಿಯವರು ಸಂಜೆಯಾಗುವಾಗ ಅಂಗಡಿಯನ್ನು ಚೆನ್ನಾಗಿ ಗುಡಿಸಿ ಪ್ಲಾಸ್ಟಿಕ್ ಇತ್ಯಾದಿ ಕಸಗಳನ್ನು ತಂದು ರಸ್ತೆ ಬದಿ ಚರಂಡಿಗೆ ಹಾಸಿದ ಕಾಂಕ್ರೀಟು ಹಲಗೆಗಳ ಎಡೆಯಲ್ಲಿರುವ ಸೆರೆಯಲ್ಲಿ ತೂರಿಸುವುದನ್ನು.

ಪೇಟೆಯಲ್ಲಿ ನಡೆವಾಗ ಇಂಥ ಗ್ಯಾಪುಗಳ ಮುಲಕ ಇಣುಕಿ ಒಳಗೆ ನೀರು ಹರಿಯುತ್ತಿದೆಯೇ ಎಂದು ನೋಡುವುದು ( ಇಣುಕುರತಿ ! ) ನನಗೊಂದು ಹವ್ಯಾಸ.ಹೀಗಾಗಿಯೇ ಕೆಲವೊಮ್ಮೆ ಹಲವರಿಗೆ ನಾನು ಡಿಕ್ಕಿ ಹೊಡೆದು ಸಾರಿ ಹೇಳಿ ಬೈಸಿಕೊಂಡದ್ದು ಉಂಟು.ಚರಂಡಿಯೊಳಗೆ ಕಾಣುವುದು ಪ್ಲಾಸ್ಟಿಕ್ ತೊಟ್ಟೆ, ಪ್ಲಾಸ್ಟಿಕ್ ಬಾಟಲಿ ಇತ್ಯಾದಿ ಮಾತ್ರ .ಇನ್ನು ಮಳೆಗಾಲದಲ್ಲಿ ನೀರು ರಸ್ತೆಯ ಮೇಲೆ ಹೋಗದೆ ಮತ್ತೆಲ್ಲಿ ನಮ್ಮ ತಲೆ ಮೇಲೆ ಹೋಗೋದಾ?

ಸಣ್ಣ-ದೊಡ್ಡ ಪೇಟೆಗಳಲ್ಲಿರುವ ತೆರೆದ ಸಣ್ಣ ಪುಟ್ಟ ತೋಡುಗಳಂತೂ ಕೇಳುವುದೇ ಬೇಡ. ಪ್ಲಾಸ್ಟಿಕ್ ತೊಟ್ಟೆಗಳಿಂದ ತುಂಬಿಹೋಗಿವೆ.ಓಡುವ ನೀರನ್ನು ನಡೆವಂತೆ ಮಾಡಿ ನಡೆವ ನೀರನ್ನು ನಿಲ್ಲುವಂತೆ ಮಾಡಿ ಅಂತ ನೀರಿಂಗಿಸುವವರು ಹೇಳುತ್ತಾರಲ್ಲ ಹಾಗೆ ತೋಡಿಗೆ ತೊಟ್ಟೆ ಹಾಕುವ ಮುಲಕ ನಾವು ಮಳೆನೀರಿಂಗಿಸುತ್ತಿದ್ದೇವೆ !!

ನಗರ ಅನ್ನುವ ಪದದಿಂದ ನಾಗರಿಕ ಅನ್ನುವ ಪದ ಬಂದಿರಬೇಕು. ನಾಗರಿಕ ಪ್ರಜ್ಞೆಯ ದೊಡ್ಡ ಕೊರತೆ ಇರುವುದು ಕೂಡ ನಗರದಲ್ಲೇ.

ಇಂಥ ಅಂಗಡಿಯವರ ನಡುವೆ ಗಿರಾಕಿಗಳಿಗೆ ಫ್ಲಾಸ್ಟಿಕ್ ತೊಟ್ಟೆಯಲ್ಲಿ ಹಾಕಿ ಪುಸ್ತಕಗಳನ್ನು ಪ್ಯಾಕ್ ಮಾಡಿ ಕೊಡೋದಿಲ್ಲಾಂತ ಖಡಾಖಡಿ ಹೇಳುವ ಮುಲಕ ವ್ಯಾಪಾರವನ್ನೂ ಕಳೆದುಕೊಳ್ಳಲು ಸಿದ್ಧವಿರುವ ಅತ್ರೀಯಂಥವರೂ ಇದ್ದಾರೆ ಅನ್ನೋದು ಸಂತೋಷದ ಸಂಗತಿ . ನಿಜವಾಗಿ ಅದು ಹೈಲೀ ಕಸ್ಟಮರ್ ಅನ್ ಫ್ರೆಂಡ್ಲೀ ಅಲ್ವೆ? ಪ್ಲಾಸ್ಟಿಕ್ ಬ್ಯಾಗ್ ಇಲ್ವ ನಿಮ್ಮಲ್ಲಿ ಅಂತ ಆಶ್ಚರ್ಯ/ಸಿಟ್ಟುಇತ್ಯಾದಿ ಭಾವಗಳಿಂದ ಕೇಳುವ ಗ್ರಾಹಕರಿಗೆ ಉತ್ತರ ಕೊಟ್ಟು ಕೊಟ್ಟು ಅಶೋಕವರ್ಧನರಿಗೆ ಬೊಡಿದು ಹೋಗಿ ಇವತ್ತಲ್ಲ ನಾಳೆ ತೊಟ್ಟೆ ಇಟ್ಟೇ (ಪುಸ್ತಕವನ್ನು) ಮಾರಿಯಾರೆಂದು ಸುಮಾರು ಸಮಯದಿಂದ ಆಲೋಚನೆ ಮಾಡುತ್ತಿದ್ದ ನನ್ನ ಗ್ರಹಿಕೆ ಸುಳ್ಳೆಂದು ನನಗೆ ಮನವರಿಕೆ ಆಗಿಯೇ ಸುಮಾರು ಸಮಯ ಆಯಿತು.

ಘನ ತ್ಯಾಜ್ಯ ವಿಲೇವಾರಿ ಹೀಗೇಕೆ ಮಾಡಬಾರದು ?

ಈಗ ನಗರಗಳ ದೊಡ್ಡ ಸಮಸ್ಯೆ ಘನ ತ್ಯಾಜ್ಯ ವಿಲೇವಾರಿ.
ಈ ಚತುಷ್ಪಥ ಇತ್ಯಾದಿ ರಸ್ತೆಗಳ ನಿರ್ಮಾಣದ ಸಂದರ್ಭವನ್ನು ತ್ಯಾಜ್ಯ ವಿಲೇವಾರಿಗೆ ಯಾಕೆ ಬಳಸಿಕೊಳ್ಳಬಾರದು ? ಮಂಗಳೂರಿನಿಂದ ಬಿ. ಸಿ .ರೋಡಿಗೆ ಹೋಗುವ ರಸ್ತೆ ಅಗಲೀಕರಣಕ್ಕೆ ಹಲವು ಕಡೆಗಳಲ್ಲಿ ಇಪ್ಪತ್ತು ಅಡಿಗಳಿಗೂ ಹೆಚ್ಚು ಎತ್ತರಕ್ಕೆ ಮಣ್ಣು ಹಾಕಲಾಗಿದೆ. ಹೀಗೆ ಸುಮಾರು ಇಪ್ಪತ್ತು ಅಡಿಗಳಿಗಿಂತ ಎತ್ತರ ಮಣ್ಣು ನಿಲ್ಲುವಲ್ಲಿ ಅಡಿಯಲ್ಲಿ ಸಣ್ಣ ತೆಳು ಪದರ ಪ್ಲಾಸ್ಟಿಕ್ ,ಕುಪ್ಪಿ ಚೂರು ಇತ್ಯಾದಿ ಘನತ್ಯಾಜ್ಯಗಳನ್ನು ಹಾಕಬಹುದಲ್ಲ? ಉದ್ದಕ್ಕೆ ಹಾಕಬಾರದು, ಅಡಿಯ ಮಣ್ಣಿಗೆ ಮೇಲಿನ ಮಣ್ಣು ಕಚ್ಚಿಕೊಳ್ಳುವಷ್ಟು ಗ್ಯಾಪ್ ಬಿಟ್ಟರಾಯಿತು. ಇಂಥಾ ವಿಷಯಗಳಲ್ಲಿ ಪುರಸಭೆ-ನಗರಪಾಲಿಕೆಯವರು ರಸ್ತೆ ಕಂತ್ರಾಟುಧಾರಿಗಳೊಂದಿಗೆ ಒಪ್ಪಂದ ಮಾಡಿಕೊಂಡರೆ ಇದು ಸುಲಭ ಸಾಧ್ಯ. ಹೇಗಿದ್ದರೂ ಹೆದ್ದಾರಿ ಅಡಿಯನ್ನು ಮುಂದಕ್ಕೆ ಅಗೆಯುವ ಅಗತ್ಯ ಕಡಿಮೆ. ಏನಿದ್ದರೂ ನಾವು ಮಾಡಿದ ಹೇಸಿಗೆಯನ್ನು ಭೂ ತಾಯಿಯೇ ಎಲ್ಲಾದರೂ ಹೊಟ್ಟೆಗೆ ಹಾಕಿಕೊಳ್ಳಬೇಕು ತಾನೆ ? ಹೆದ್ದಾರಿಗಳು ಎಲ್ಲವನ್ನು ನುಂಗಿ ನೊಣೆಯುತ್ತವೆ. ಸ್ವಲ್ಪ ಪ್ಲಾಸ್ಟಿಕ್ ಕೂಡ ನುಂಗಲಿ.ಅಷ್ಟಾದ್ರೆ ಅಷ್ಟು.

ಇಲಾಖೆಗಳ ಮಧ್ಯೆ ಹೊಂದಾಣಿಕೆ ಇಲ್ಲದ,ವಿವಿಧ ಆಡಳಿತಾತ್ಮಕ ವಿಭಾಗಗಳಿಗೆ ಪರಸ್ಪರ ಪರಿಚಯವೇ ಇಲ್ಲದ ನಮ್ಮ ದೇಶದಲ್ಲಿ ಇದೆಲ್ಲ ಸಾಧ್ಯವೇ ಅನ್ನೋದು ಪ್ರಶ್ನೆ.

ಇನ್ನೋದು ಬೇಸರದ ಸಂಗತಿ ಅಂದರೆ ಕಸದ ತೊಟ್ಟಿಗಳನ್ನು ಖಾಲಿ ಮಾಡಿ ಲಾರಿಗೆ ಮನುಷ್ಯರೇ ಕೈಗೆ ಗವಸು ಕೂಡ ಇಲ್ಲದೆ ಲೋಡು ಮಾಡುವ ಪರಿಸ್ಥಿತಿ ಹಲವು ಕಡೆಗಳಲ್ಲಿ ಈಗಲೂ ಉಳಿದಿರುವುದು.ಅದನ್ನೂ ನಿರ್ದಿಷ್ಟ ಜಾತಿಯವರೇ ಮಾಡಬೇಕಾಗಿರುವುದು ಖೇದಕರ. ಇಷ್ಟೆಲ್ಲ ಯಾಂತ್ರೀಕರಣ ಆಗಿರುವಾಗ ಜೆ ಸಿ ಬಿ ಅಥವಾ ಅದನ್ನೆ ಸ್ವಲ್ಪ ಮಾರ್ಪಾಡು ಮಾಡಿದ ಯಂತ್ರದ ಮುಲಕ ಈ ತೊಟ್ಟಿ ಖಾಲಿ ಕೆಲಸ ಮಾಡುವುದೇನೂ ಕಷ್ಟವಲ್ಲ . ಆ ಕಾರ್ಮಿಕರಿಗೆ ಕೆಲಸ ಇಲ್ಲ ಅಂತೇನೂ ಆಗಲಾರದು.ಅವರಿಗೆ ಪೇಟೆ ಸ್ವಚ್ಚತಾ ಮೇಲುಸ್ತುವಾರಿ ಜವಾಬ್ದಾರಿ ಕೊಟ್ಟರಾಯಿತು. (ಗಣಕ ಯಂತ್ರ ಬಂದಾಗ ಕೆಲಸ ಕಳ್ಕೊಳ್ತಾರೆ ಅಂತ ಬೊಬ್ಬೆ ಹೊಡೆದವರೆಷ್ಟು ಮಂದಿಯೋ ? ಹೊಸ ಕೆಲಸ ಸ್ರುಷ್ಟಿ ಆಗಲಿಲ್ವೆ ? )


ಕೊನೆ ಬೆಡಿ:

ಕತ್ತಲ ಹಾದಿಯಲ್ಲಿ ನಡೆವವರು ಎಡವುವುದನ್ನು ಯಾರೂ ನೋಡುವುದಿಲ್ಲ.

ಅಪರಾಧ ಮತ್ತು ಶಿಕ್ಷೆ
ಕ್ಷಮಿಸಿ, ನನ್ನ ಅಭಿಪ್ರಾಯ ಈಗಿನ ಬಹುತೇಕ ಜನರ ಅಭಿಪ್ರಾಯಕ್ಕಿಂತ ಬೇರೆಯಾಗಿದೆ.ಅದರಲ್ಲೂ ಮಾನವ ಹಕ್ಕಿನ ಬಗ್ಗೆ ಕಾಳಜಿ ಉಳ್ಳವರ ಮಟ್ಟಿಗಂತೂ ಅಮಾನವೀಯವಾಗಿ ಕಾಣುವಂತಿರಬಹುದು.ಇರಲಿ. ಅಪರಾಧಕ್ಕೆ ಶಿಕ್ಷೆ ಯಾಕೆ?ಈ ಪ್ರಶ್ನೆ ವಿಚಿತ್ರವಾಗಿ ಕಾಣಬಹುದು. ತುಂಬಾ ಜನ ಅಂದುಕೊಳ್ಳುವುದೇನೆಂದರೆ ಅಪರಾಧ ಮಾಡಿದ್ದಕ್ಕಾಗಿ ಶಿಕ್ಷೆ ಅಂತ. ವಾಸ್ತವವಾಗಿ ಶಿಕ್ಷೆ ಕೊಡಬೇಕಾದದ್ದು ಮತ್ತು ಕೊಡುವುದು ಆತ ಇನ್ನು ಮುಂದೆ ಅಪರಾಧ ಮಾಡಬಾರದು ಎಂದಷ್ಟೆ ಅಲ್ಲ .ಅದಕ್ಕಿಂತ ಮುಖ್ಯವಾಗಿ,ಅಂಥ ಅಪರಾಧಗಳನ್ನು ಬೇರೆಯವರು ಮಾಡಬಾರದು ಎಂಬ ಕಾರಣಕ್ಕಾಗಿ.ಹಾಗಾಗಿ ಅಪರಾಧದ ಪ್ರಮಾಣಕ್ಕೆ ಅನುಗುಣವಾಗಿ ಕಠಿಣ ಶಿಕ್ಷೆಯೇ ಆಗಬೇಕಾಗುತ್ತದೆ.
ಭಿನ್ನಾಭಿಪ್ರಾಯ ಎಂದೆನಲ್ಲ, ಅದು ಜೈಲುಗಳ ಬಗ್ಗೆ. ಜೈಲುಗಳು ಕೆಟ್ಟ ಸ್ಥಿತಿಯಲ್ಲಿವೆಯೆಂದು ಎಲ್ಲರೂ ಬೊಬ್ಬೆ ಹೊಡೆಯುತ್ತಾರೆ.ಜೈಲುಗಳು ಇರಬೇಕಾದದ್ದೇ ಹಾಗೆ. ಅಲ್ಲದಿದ್ದರೆ ಅದು ಶಿಕ್ಷೆಯಾಗುವುದು ಹೇಗೆ? ವಿಚಾರಣಾಧೀನ ಕೈದಿಗಳಿಗೆ ಮಾತ್ರ ಒಳ್ಳೆ ವ್ಯವಸ್ಥೆಯಿರಬೇಕು ನಿಜ.ಹಾಗಾಗಿ ಅವರಿಗೆ ಬೇರೆಯೇ ಜೈಲುಗಳು ಬೇಕು.ಈ ಮಟ್ಟಿಗೆ ಜೈಲು ವ್ಯವಸ್ಥೆ ಸುಧಾರಣೆಯಾಗಬೇಕೆಂಬುದು ನಿಜ. ನ್ಯಾಯಾಲಯದಿಂದ ತಪ್ಪಿತಸ್ಥರೆಂದು ತೀರ್ಮಾನವಾದ ಕೈದಿಗಳಿಗೆ ಈಗಿರುವುದಕ್ಕಿಂತ ಕೆಟ್ಟ ಜೈಲುಗಳೇ ಬೇಕು.ಅವರಿಗೆ ನಾಟಕ ಅದು ಇದು ಮನರಂಜನೆ ಇತ್ಯಾದಿ ಇರಬಾರದು.ಅವರ ಮನಪರಿವರ್ತನೆ ಮಾಡಬೇಕು ಎಂಬುದೆಲ್ಲ ಬರೀ ಬೊಗಳೆ.ಹಾಗೆ ಮನಪರಿವರ್ತನೆ ಆಗಬೇಕಾದರೆ ಶಿಕ್ಷಿಸದೆ ಬಿಡುವುದೇ ಒಳ್ಳೆಯದು.
ತಪ್ಪು ಮಾಡಿದವರನ್ನು ಕ್ಷಮಿಸಬೇಕು ಅಂತೆಲ್ಲ ಹಲವು ಪ್ರಾಜ್ಞರು,ಸಂತರು ಹೇಳಿದ್ದಾರೆ ನಿಜ; ತಪ್ಪು ಮಾಡಿದವರಿಗೆ ಕಠಿಣ ಶಿಕ್ಷೆ ಕೊಡುವುದು ತಪ್ಪು ಅಂತಾದರೆ ಈ ಎರಡನೆ ತಪ್ಪನ್ನೂ ದೇವರು ಮನ್ನಿಸಿಯಾನು.
ಎಲ್ಲದಕ್ಕಿಂತ ಮೊದಲು ಆಗಬೇಕಾದದ್ದು ಏನೆಂದರೆ, ಈಗಿರುವುದಕ್ಕಿಂತ ಹತ್ತು ಪಟ್ಟು ನ್ಯಾಯಾಲಯಗಳನ್ನು ಸ್ಥಾಪಿಸುವುದು.ಎಲ್ಲ ಹಂತಗಳಲ್ಲು ನ್ಯಾಯಾಲಯಗಳು ಹೆಚ್ಚಾಗಬೆಕು. ನ್ಯಾಯತೀರ್ಮಾನವು ಅತ್ಯಂತ ಶೀಘ್ರವಾಗಿ ಆಗಬೇಕಾದುದು ಮುಖ್ಯ.ವಿಚಾರಣಾಧೀನವಾಗಿ ಕೈದಿಗಳು ಕೊಳೆಯಬಾರದು. ಪ್ರತಿ ಹಂತದ ನ್ಯಾಯಾಧೀಶರ ತೀರ್ಪುಗಳು ವಿಮರ್ಶೆಗೆ ಒಳಗಾಗಬೇಕು.ಒಬ್ಬ ನ್ಯಾಯಾಧೀಶನ ಇಂತಿಷ್ಟು ಖಟ್ಳೆಗಳು ಮೇಲಿನ ಹಂತದಲ್ಲಿ ಬಿದ್ದು ಹೋದರೆ ಆತನಿಗೆ ಹಿಂಬಡ್ತಿ, ವಜಾ ಇತ್ಯಾದಿ ಶಿಕ್ಷೆಗಳಾಗಬೇಕು.ಇದು ತಾಲೂಕು ಮಟ್ಟದಿಂದ ಮೇಲಿನವರೆಗೂ ಅನ್ವಯಿಸಬೇಕು.ಸುಪ್ರೀಂ ಕೊರ್ಟ್ ನ್ಯಾಯಾಧೀಶರೇ ಹಾಳಾದರೆ ದೇವರೇ ಗತಿ !?
ಪೋಲಿಸರ ಬಗ್ಗೆ ಕೂಡ ಮಾನವ ಹಕ್ಕಿನವರಿಗೆ ಇರುವುದಕ್ಕಿಂತ ಹೆಚ್ಚು ಸಹಾನುಭೂತಿ ನನಗಿದೆ.ಯಾಕೆಂದರೆ ಪೋಲಿಸರು ಕೂಡಾ ಮಾನವರೇ ಎಂದು ನನ್ನ ಅಲ್ಪ ತಿಳುವಳಿಕೆಗೆ ತೋರುತ್ತದೆ.ಲಾಕಪ್ ಡೆತ್,ಎನಕೌಂಟರ್ ಇತ್ಯಾದಿ ಆರೋಪಗಳು ಇವೆ ಬಿಡಿ.ಆದರೂ ಕೊಲೆಗಾರನೊಬ್ಬನನ್ನು ಹಿಡಿದು, ಆರಾಮಕುರ್ಚಿಯಲ್ಲಿ ಕೂರಿಸಿ ಚಾ ತರಿಸಿ "ನೀವು ಕೊಲೆಗೆ ಬಳಸಿದ ಆಯುಧ ಎಲ್ಲಿದೆ ದಯಮಾಡಿ ಹೇಳಿ" ಎಂದರೆ ಅವರು ತಂದುಕೊಟ್ಟಾರು ಅಂತ ಕೆಲವರು ಅಂದಾಜು ಮಾಡುತ್ತಾರೆ.ಏನು ಮಾಡೋಣ, ಪೊಲೀಸರ ದೌರ್ಜನ್ಯವನ್ನು ನೆನಪು ಮಾಡಿಕೊಳ್ಳುವಾಗ ಅವರ ಅಸಹಾಯಕತೆಯನ್ನೂ ನಾವು ನೆನಪಿಸಿಕೊಳ್ಳಬೇಕು.
ಕಸಬನ ಉದಾಹರಣೆ ತೆಗೆದುಕೊಳ್ಳಿ. ೩೦೦ ಚಿಲ್ರೆ ಸಾಕ್ಷಿಗಳ ಪಾಟೀಸವಾಲು ಆಗಬೇಕೆಂದು ಅವನ ವಕೀಲ ಹೇಳಿದ್ದನಂತೆ. ಕೋರ್ಟ್ ೭೦ ಸಾಕು ಅಂತ ಹೇಳಿದೆಯಂತೆ.೭೦ ಜನರನ್ನಾದರೂ ಪಾಟೀಸವಾಲು ಮಾಡಬೇಕಾದರೆ ಎಷ್ಟು ದಿನ ಬೇಕು ಲೆಕ್ಕ ಹಾಕಿ. ಒಂದು ಕೊಲೆಯನ್ನು ೧೦೦೦ ಜನ ನೋಡಿದ್ದೇವೆಂದು ಹೇಳಿದರೆ ಅಷ್ಟೂ ಜನರನ್ನು ಪಾಟೀಸವಾಲು ಮಾಡಬೇಕೆಂದಾಯಿತು.ಪುಣ್ಯಕ್ಕೆ ಕಸಬ ಗುಂಡು ಹಾರಿಸುವುದನ್ನು ಟಿ.ವಿ.ಯಲ್ಲಿ ನೋಡಿದ ಅಷ್ಟೂ ಮಂದಿಯನ್ನು ಪಾಟೀಸವಾಲು ಮಾಡಲಿಕ್ಕಿದೆ ಅಂತ ಆ ವಕೀಲ ಹೇಳಲಿಲ್ಲ!!ಅವನಿಗೆ ಉರ್ದುವಿನಲ್ಲಿ ಚಾರ್ಜುಶೀಟು ಬೇರೆ ಬೇಕಂತೆ.ಅವನು ಮೈನರೋ ಮೈನೆರೆದಿದ್ದಾನೋ ಅಂತ ನೋಡಲಿಕ್ಕೇ ನಮ್ಮ ಸರಕಾರಕ್ಕೆ ಎಷ್ಟು ಖರ್ಚಾಯಿತು ಎಂದು ದೇವರಿಗೇ ಗೊತ್ತು.ಕಸಬ್ ಒಂದು ಉದಾಹರಣೆ ಮಾತ್ರ. ಗಾಂಧೀಜಿ ಹಿಂದ್ ಸ್ವರಾಜ್ ನಲ್ಲಿ ವಕೀಲರನ್ನು ಬೈದದ್ದು ಸುಮ್ಮನೆ ಅಲ್ಲ.ಸತ್ಯ ಎಲ್ಲರಿಗೂ ಪರಮಮೌಲ್ಯವಾಗಬೇಕಾದದ್ದು ನ್ಯಾಯ ತಾನೆ?ಅದರಲ್ಲೂ ನ್ಯಾಯಾಲಯದಲ್ಲಿ ?ಆದರೆ ನ್ಯಾಯವಾದಿಗಳು "ಈತ ಅಪರಾಧಿಯಾಗಿದ್ದರೆ ನನ್ನ ಈ ಕಕ್ಷಿಗಾರನಿಗೆ ಶಿಕ್ಷೆಯಾಗುವಂತೆ ನಾನೇ ವಾದಿಸುತ್ತೇನೆ.ಸತ್ಯವನ್ನೇ ಹೇಳುತ್ತೇನೆ" ಎಂದೆಲ್ಲ ಯಾವ ಪ್ರತಿಜ್ಞೆಯನ್ನೂ ಮಾಡುವುದಿಲ್ಲವಲ್ಲ.
ಕೊನೆ ಬೆಡಿ:
ಸುಳ್ಳು ಹೇಳುವುದು ಅನ್ಯಾಯ.ಆದರೆ ಬೇರೆಯವರ ಪರವಾಗಿ ಸುಳ್ಳು ಹೇಳುವವನು ನ್ಯಾಯವಾದಿ.

ಶೂನ್ಯದೊಳಗೆ
ಬ್ರಹ್ಮಾಂಡ
ಕಂಡು
ಕಾಣದ್ದನ್ನು
ಕಂಡೆ
ಎನ್ನದೆ
ಕಂಡದ್ದನ್ನು
ಬಯಲಾಗಿಸಿದ
ಎಲ್ಲ
ತತ್ವಜ್ಞಾನಿಗಳಿಗೆ
ನಮಸ್ಕಾರ.

ಕನ್ನಡ
ಕೀಲಿಮಣೆ
ಪ್ರಮಾಣಬದ್ಧ
ಮಾಡಿದ
ಕಿನ್ನಿಕಂಬಳ
ರಾಯರಿಗೆ
ನಮೋನ್ನಮಃ.

"ಜಾಲಲೇಖ"ವೆಂಬ ಹೆಸರು
ಇಂಗ್ಲಿಶಿನಲ್ಲಿ ಬ್ಲಾಗ್ ಎಂದು ಕರೆಯುವುದನ್ನು ಕನ್ನಡದಲ್ಲಿ ಜಾಲಲೇಖವೆಂದು ಕರೆಯಬಹುದೆಂದು ನನಗೆ ತೋರುತ್ತದೆ.
ಜಾಲತಾಣ ಎಂದು ಕರೆದ ಹಾಗೆ ಇದು.ಲೇಖಜಾಲ ಎಂದೂ ಕರೆಯಬಹುದಾಗಿತ್ತು; ಆದರೆ,ಆಗ ಜಾಲಕ್ಕೇ ಹೆಚ್ಚು ಮಹತ್ವ ಕೊಟ್ಟ ಹಾಗೆ ಆಗುತ್ತದೆ ಅಂತ ನನ್ನ ಅಂದಾಜು.ಬೇರಾರಾದರೂ ಈಹೆಸರು ಅಥವಾ ಬೇರೆ ಯಾವುದಾದರೂ ಹೆಸರನ್ನು ಬ್ಲಾಗ್ ಗೆ ಕನ್ನಡದಲ್ಲಿ ಈಗಾಗಲೇ ಇಟ್ಟಿದ್ದಾರೆಯೇ ಅಂತ ನನಗೆ ಗೊತ್ತಿಲ್ಲ. ಯಾರಾದರೂ ಗೊತ್ತಿದ್ದರೆ ತಿಳಿಸಬೇಕಾಗಿ ಕೋರಿಕೆ.
ಬ್ಲಾಗ್ ಅಂದರೆ ಅದು ಜಾಲದಲ್ಲಿ ಇರುವ ಲೇಖ.ಇತರರು ತಮ್ಮ ಪ್ರತಿಕ್ರಿಯೆಗಳೊಂದಿಗೆ ಆ ಜಾಲದಲ್ಲಿ ಲೇಖಗಳನ್ನು ತುಂಬಿಸುತ್ತ
ಹೋಗಬಹುದು.ಸಂಸ್ಕ್ರತವನ್ನು ಕಂಡರಾಗದವರು ಈ ಹೆಸರನ್ನು ಒಪ್ಪಲಾರರು.ಸದ್ಯಕ್ಕೆ ಅದಕ್ಕೇನೂ ಮಾಡಲಾಗದು.
ಕನ್ನಡದಲ್ಲಿ ಸಂಸ್ಕ್ರತದಿಂದ ಬಂದ ಪದಗಳನ್ನು ಬಳಸುವ ಬಗ್ಗೆ ಇರುವ ವಾದವಿವಾದಗಳ ಬಗ್ಗೆ ಒಮ್ಮೆ ಪುರುಸೊತ್ತಾದರೆ ಇಲ್ಲೇ ಚಿಂತಿಸೋಣ.
"ಚಿಂತನ ಬಯಲು" ಎಂಬ ಹೆಸರು
ಚಿಂತನ ಬಯಲು ನನ್ನ ಪುಸ್ತಕವನ್ನು ಪ್ರಕಟಿಸಿದ ಪ್ರಕಾಶನದ ಹೆಸರೂ ಹೌದು.ನನ್ನ ಆ ಪುಸ್ತಕ( ಬುದ್ಧಿಜೀವಿ ವರ್ಸಸ್ ಬೌದ್ಧಿಕ ಸ್ವಾತಂತ್ರ್ಯ)ದ ಮುಖ್ಯ ಆಶಯ ಕೂಡ ಚಿಂತನೆ ಬಯಲಿನಲ್ಲಿ ಎಲ್ಲ ದಿಕ್ಕುಗಳಲ್ಲಿಯು ಹರಿವಂತಿರಬೇಕು ಎಂಬುದೇ ಆಗಿತ್ತು. ಆ ಆಶಯ ಎಷ್ಟು ಈಡೇರಿದೆ ಎಂಬುದು ನನಗೆ ಗೊತ್ತಿಲ್ಲ.ಚಿಂತನೆಗೆ ಕೇಂದ್ರವಾಗಲೀ ಪರಿಧಿಯಾಗಲೀ ಅಗತ್ಯವಿಲ್ಲ.ಚಿಂತನವೆಂಬುದು ಬಯಲಲ್ಲಿ ಬಯಲಾಗಬೇಕಾದುದು.ಎಷ್ಟೇ ದೊಡ್ಡ ಚಿಂತನೆಯಾದರೂ ಕೊನೆಗೆ ಬಯಲೇ ಅಂದರೆ,ಶೂನ್ಯವೇ ಆಗಬೇಕಷ್ಟೆ.ಇಂಥ ದೊಡ್ಡ ಫಿಲಾಸಫಿಗಳೆಲ್ಲ ಸದ್ಯಕ್ಕೆ ಬದಿಗಿರಲಿ. ನಮ್ಮ ಮುಂದಿರುವ ಜಗತ್ತನ್ನು ನೋಡುವಾಗ ಎಷ್ಟೋ ಸಲ ಏನೇನೋ ಅಂದುಕೊಳ್ಳುತ್ತೇವೆ. ಅಂದುಕೊಂಡದ್ದನ್ನೆಲ್ಲ ಹೇಳಲು ಸಾಧ್ಯವಿಲ್ಲ ಬಿಡಿ. ಆದರೆ ಕೆಲವನ್ನು ಹೇಳಲೇಬೇಕು ಅನಿಸುತ್ತಲ್ಲ ಅವನ್ನು ಹೇಳಬೇಕಾಗುತ್ತದೆ.
ಈ ಜಾಲಲೇಖದಲ್ಲಿ, ನನಗೆ ಹೇಳಲೇಬೇಕು ಅನ್ನಿಸಿದ ವಿಚಾರಗಳನ್ನು ಹೇಳಬೇಕು ಅಂತ ಅಂದುಕೊಂಡಿದ್ದೇನೆ.

ಬೇರೆ ಕಡೆ ಹೇಳಲಾಗದ್ದನ್ನು ಇಲ್ಲೇ ಹೇಳಬೇಕಷ್ಟೆ.ಅಂದರೆ, ಎಷ್ಟೋ ವಿಷಯಗಳನ್ನು ಪತ್ರಿಕೆಗಳು ಪ್ರಕಟಿಸಲಾರವು;ಅಂಥವುಗಳನ್ನು ಹೇಳಲು ಇದು ಒಂದು ಒಳ್ಳೆ ಜಾಗ. ಉದಾಹರಣೆಗೆ, ದೊಡ್ಡ ಪ್ರಶಸ್ತಿ ಪಡೆದ,ಎ.ಎನ್.ಮುರ್ತಿರಾಯರ "ದೇವರು" ಒಂದು ಬಾಲಿಶ ಪುಸ್ತಕ ಅಂತ ಹೇಳಿದರೆ ಹೇಗಾದೀತು ?
ಮುರ್ತಿರಾಯರ "ದೇವರು"
ಮುರ್ತಿರಾಯರು ದೊಡ್ಡ ಲೇಖಕರು ಎಂಬುದರಲ್ಲಿ ಅನುಮಾನವಿಲ್ಲ. ಆದರೆ ಈ ಪುಸ್ತಕ ಮಾತ್ರ ಅವರ ಕೀರ್ತಿಯನ್ನು ಹೆಚ್ಚಿಸುವಂಥದ್ದಲ್ಲ. ದೇವರು ಇಲ್ಲವಲ್ಲ ಅಂತ ವಿಷಾದದಿಂದ ಬರೆಯುತ್ತಿದ್ದೇನೆ ಎಂದು ಲೇಖಕರು ಹೇಳ್ತಾರೆ.ಆ ವಿಷಾದದಿಂದಲೇ ಹಿಂದಿನವರು ದೇವರನ್ನು ಸ್ರಷ್ಟಿ ಮಾಡಿದ್ದು ಅಂತ ಅವರೇನೂ ಯೋಚನೆ ಮಾಡೋದಿಲ್ಲ.ದೇವರ ಕುರಿತ ನಂಬಿಕೆಗಳ ಬಗ್ಗೆ ಹೇಳುವಾಗ ಗಿಡ ಮರ ಪ್ರಾಣಿಗಳೆಲ್ಲ ದೇವರಾಗುವ ಬಗ್ಗೆ ಗೇಲಿ ಮಾಡ್ತಾರೆ.ದೇವರ ಅಸ್ತಿತ್ವ ನಿರಾಕರಿಸಲು ತರ್ಕವನ್ನು ಬಾಲಿಶವಾಗಿ ಬಳಸಿಕೊಳ್ತಾರೆ. ಉದಾ:ಪು.೪೬. ವೈಚಾರಿಕವಾಗಿ ,ವೈಜ್ಞಾನಿಕವಾಗಿ,ಕಾರ್ಯಕಾರಣನಿಯಮದ ಆಧಾರದಲ್ಲಿ ದೇವರ ಅಸ್ತಿತ್ವ ನಿರಾಕರಿಸುವುದಾದರೆ ಅದಕ್ಕೆ ಒಂದು ಪುಸ್ತಕ ಬೇಡ. ೪-೫ ವಾಕ್ಯಗಳು ಸಾಕು.ಡಿ.ವಿ.ಜಿ.ಯವರ ಪುಸ್ತಕಕ್ಕೆ ಪ್ರತಿಕ್ರಿಯೆಯಾಗಿ ಬರೆದದ್ದು ಎನ್ನುತ್ತಾರೆ.ಡಿ.ವಿ.ಜಿ.ಯವರು ಮಿಥಕಗಳನ್ನು ಇಷ್ಟು ಸರಳವಾಗಿ ವ್ಯಾಖ್ಯಾನಿಸುವುದಿಲ್ಲ.ರಾಮಾಯಣ ಮಹಾಭಾರತಗಳನ್ನು ಕಾವ್ಯವಾಗಿ ಓದಬೇಕೆಂದು ಡಿ.ವಿ.ಜಿ. ಹೇಳುತ್ತಾರೆ."ದೇವರು" ಹೇಗೆ ಒಂದು ಕಳಪೆ ಪುಸ್ತಕ ಅಂತ ಗೊತ್ತಾಗಬೇಕಾದರೆ ಇದಕ್ಕಿಂತಲೂ ೨ ವರ್ಷ ಮೊದಲೇ ಪ್ರಕಟವಾದ ಗೌರೀಶ ಕಾಯ್ಕಿಣಿಯವರ" ನಾಸ್ತಿಕನು ಮತ್ತು ದೇವರು "
ಎಂಬ ಉತ್ತಮ ಪುಸ್ತಕ ನೋಡಬೇಕು.ಕಾಯ್ಕಿಣಿಯವರ ಪುಸ್ತಕದೆದುರು ಇದೇನೂ ಅಲ್ಲ.
೮೦ ವರ್ಷ ಪ್ರಾಯ ಕಳೆದ ಮೇಲೆ ಮುರ್ತಿರಾಯರು ಇಂಥ ಬಾಲಿಶ ಪುಸ್ತಕ ಬರೆದದ್ದು ಆಶ್ಚರ್ಯವಲ್ಲ;ಅದಕ್ಕೆ ಕನ್ನಡದ ದೊಡ್ಡ ಪ್ರಶಸ್ತಿ ಸಿಕ್ಕಿದ್ದೂ ಆಶ್ಚರ್ಯವಲ್ಲ; ಕನ್ನಡದ ಸದ್ಯದ ವಿಮರ್ಶಾಲೋಕವನ್ನು ನೋಡಿದರೆ.
ವೈಯೆನ್ಕೆಯವರು" ಕೊನೆಸಿಡಿ"ಅಂತ ಕೊನೆಗೊಂದು ಭಾಗ ಬರೆಯುತ್ತಿದ್ದುದು ನಿಮಗೆ ಗೊತ್ತಿರಬಹುದು.ಹಾಗೆ ಇಲ್ಲೊಂದು "ಕೊನೆಬೆಡಿ"ಯಿದೆ.ಕೊನೆಬೆಡಿಯೆಂಬುದು ನಾನು ಮತ್ತು ನನ್ನ ಕ್ಲೋಸು ಫ್ರೆಂಡು ಕೆ.ಎಸ್.ರವಿಪ್ರಕಾಶ್ ಸುಮಾರು ೨೦ ವರ್ಷಗಳ ಹಿಂದೆ ಪರಸ್ಪರ ಪತ್ರ ಬರೆವಾಗ ಕೊನೆಯಲ್ಲಿ ಸಿಡಿಸುತ್ತಿದ್ದ ಬೆಡಿ.ಈ ಶಬ್ದವನ್ನು ಬಹುಶಃ ಮೊದಲು ಬಳಸಿದ್ದು ಅವನೆ ಇರಬೇಕು.ಈಗ ನಾವಿಬ್ಬರೂ ಪರಸ್ಪರ ಕಳೆದುಹೋಗಿದ್ದೇವೆ.( ಅವನ ಈ ಮೇಲ್ ಐಡಿಯನ್ನು ಯಾರಾದರೂ ನೀಡಿದರೆ ಕ್ರತಜ್ಞತಾಪೂರ್ವಕವಾಗಿ ಸ್ವೀಕರಿಸಲಾಗುವುದು).
ಕೊನೆಬೆಡಿ:
ನನಗೆ ಹಣ್ಣು ಹಣ್ಣು ಮುದುಕರನ್ನು ಕಂಡರೆ ಅಸೂಯೆಯಾಗುತ್ತದೆ ಯಾಕೆಂದರೆ ನನಗೆ ಅಷ್ಟು ಮುದುಕನಾಗುವ ಭರವಸೆಯಿಲ್ಲ.